WAZIRI MKUU ASHIRIKI MAZISHI YA MWENYEKITI WA CCM

JOE MUSHI November 06, 2019 Kitaifa, MATUKIO PICHA,

Waombolezaji wakiwa wamebeba jeneza la mwanasiasa mkongwe na Mwenyekiti wa zamanı wa CCM wa wilaya ya Ruangwa, Kaspar Selemani Mmuya katika mazishi yaliyofanyika nyumbani kwa marehemu katika kijiji cha Nangumbu kwenye kitongoji cha Mtakuja wilayani Ruangwa, Novemba 5, 2019. (Picha na Ofisi ya Waziri Mkuu).

Waziri Mkuu, Kassim Majaliwa na Mkewe Mary wakitupa udongo kwenye kaburi la mwanasiasa mkongwe na Mwenyekiti wa zamanı wa CCM wa wilaya ya Ruangwa, Kaspar Selemani Mmuya katika mazishi yaliyofanyika nyumbani kwa marehemu katika kijiji cha Nangumbu kwenye kitongoji cha Mtakuja wilayani Ruangwa, Novemba 5, 2019. (Picha na Ofisi ya Waziri Mkuu).

WAZIRI MKUU Kassim Majaliwa ameshiriki katika mazishi ya mwanasiasa mkongwe na Mwenyekiti wa zamani wa CCM wa wilaya ya Ruangwa, Bw. Kaspar Selemani Mmuya yaliyofanyika kwenye Kitongoji cha Mtakuja, kijiji cha Nangumbu wilaya ya Ruangwa mkoani Lindi.

Akizungumza katika mazishi hayo, Waziri Mkuu amesema marehemu Bw. Mmuya enzi za uhai wake alitoa ushirikiano mzuri kwa viongozi na wananchi wa Ruangwa kwa ujumla na wakati wote alikuwa tayari kutoa ushauri katika masuala ya siasa na uongozi.

Waziri Mkuu ambaye pia ni mbunge wa jimbo la Ruangwa mkoani Lindi, ameshiriki katika mazishi ya mwanasiasa huyo mkongwe yaliyofanyika Novemba 5, 2019. Amesema marehemu alikuwa kiongozi makini na mwenye kupenda ushirikiano.

“Marehemu alikuwa kiongiozi wangu na mshauri wa masuala ya siasa na kijamii wakati wote nilipomuomba au yeye mwenyewe alipoona iko haja ya kufanya hivyo. Wakati wote wa uhai wake alikuwa tayari kusikiliza na kushauri, “ alisisitiza Waziri Mkuu .

Mazishi hayo pia yamehudhuriwa na Naibu Waziri wa Nchi OWM - Sera, Uratibu, Bunge, Kazi, Ajira, Vijana, Anthony Mavunde, Mkuu wa Mkoa wa Lindi Godfrey Zambi, Mwenyekiti wa CCM wa Mkoa wa Lindi, Fadhili Juma, Viongozi wa chama cha Walimu Tanzania wa Mkoa wa Lindi na Wilaya ya Ruangwa pamoja na viongozi wa Serikali na vyama vya Siasa.

Mapema leo asubuhi Mheshimiwa Majaliwa alishiriki katika kikao cha Bunge kwenye ukumbi wa Bunge jijini Dodoma.