TCRA WAANZA KUZIMA RASMI LAINI ZISIZOSAJILIWA KWA ALAMA ZA VIDOLE

Makao Makuu ya TCRA Dar es Salaam.

MAMLAKA ya Mawasiliano Tanzania (TCRA) imeanza rasmi kuzima baadhi laini za wateja ambazo hazijasajiliwa kwa mfumo wa alama za vidole. Zoezi lililoanza kutekelezwa kuanzia usiku wa Januari 20, 2020.  

Wakizungumza kwa nyakati tofauti baadhi ya wateja ambao wamekubwa na kadhia hiyo, wamesema wanafanya utaratibu wa kusajili laini zao baada ya kuzimwa jana. “Mimi nimeshangaa jana usiku laini yangu imezima na sina mawasiliano tena sasa nafanya utaratibu nikasajili tena…mwanzoni nilijua uongo haita zimwa ndo maana nilisubiri,” alisema mteja huyo.

Mteja mwingine ambaye laini yake imezimwa naye alimweleza mwandishi wa habari hizi kuwa alishindwa kukamilisha usajili kutokana na usongamano wa usajili wa lalasalama hivyo ataenda kusajili baada ya msongamano kutulia.

Hadi kufikia Jumatano Januari 15, jumla ya laini 27,287,091 zilikuwa zimesajiliwa wiki iliyopita, ambayo ni sawa na asilimia 56 ya watu 48, 717, 967 ambao wana laini za simu.

Hii inamaanisha laini 21,430,876 ambazo ni sawa na (44%) zilikuwa hazijasajiliwa kwa mfumo huo mpya, hali inayowaweka katika hatari ya kusitishiwa huduma endapo mamlaka ya Mawasiliano nchini Tanzania (TCRA) itazima mawasiliano.

Mkurugenzi Mkuu wa TCRA, James Kilaba akizungumza na Shirika la Habari la Taifa (TBC). Kwa mujibu wa Kilaba, uzimaji huo unafanyika kwa awamu ili kuondoa usumbufu.

"...usajili wa laini hauna kikomo. Tunazima kidogo kwa sababu ya mambo ya kitaalamu, hauwezi ukazima laini milioni tano au 10 kwa mara moja." Kilaba amesema uzimaji wa laini za simu ambazo hazijasajiliwa kwa alama za vidole unafanyika kwa awamu kuanzia jana Jumatatu Januari 20, 2020 ili kuondoa usumbufu."