WADAU WAWEKA MIKAKATI KUPAMBANA NA UKEKETAJI MANISPAA YA ILALA

JOE MUSHI September 03, 2018 Kitaifa,

Afisa Programu Utetezi na Ushiwishi kutoka TGNP Mtandao, Deogratius Temba akizungumza.

Na Mwandishi Wetu

VIONGOZI wa serikali za Mitaa na Jeshi la Polisi wameshauriwa kushirikiana na wananchi kuhakikisha vitendo vya Ukatili wa Kijinsia hasa Ukeketaji vinakomeshwa Jijini Dar es Salaam.

Akizungumza wakati wa Mjadala wa Bunge la Jamii uliohusiha Viongozi wa Mitaa yote ya Kata ya Kitunda Manispaa ya Ilala, jijini Dar es salaam, waalimu wa shule za msingi na sekondari, Jeshi la Polisi na wadau wa mapambano dhidi ya Ukatili wa Kijinsia, Afisa Programu Utetezi na Ushiwishi kutoka TGNP Mtandao, Deogratius Temba, alisema vita dhidi ya Ukeketaji wa wasichana ndani ya Manispaa ya Ilala itafanikiwa endapo wadau wote watashirikiana.

Wakati wa mjadala huo ambao ni sehemu ya mradi wa Kupambana na mila potofu zinazosababisha kuendelea kwa vitendo vya ukatili kwa wanawake na watoto unaofadhiliwa na Foundation for Civil Society (FCS), wadau kwa pamoja walikubaliana kuuanda kamati za kutokomeza Ukatili wa Kijinsia ngazi za mitaa kama sehemu ya utekelezaji wa Mpango kazi wa Taifa wa Miaka Mitano wa Kutokomeza Ukatili kwa Wanawake na watoto (NPA) unaotekelezwa kuanzia 2016/17-2021/22.

“Leo tumekubaliana hapa kuunda kamati za Kutokomeza Ukatili wa Kijinsia, Taarifa zipo kwetu sisi wananchi, unapomuona jirani yako anapanga sherehe za kumkeketa msichana wa shule, toa taarifa kwa kamati au kwa mtendaji wa kata ili hatua zichukuliwe….”alisema Temba.

Mtendaji wa Kata ya Kitunda Hamza Juma alisema kwamba, vita dhidi ya Ukatili wa Kijinsia inawezekana endapo watendaji wa Mitaa, wenyeviti na maafisa maendeleo ya Jamii Kata watawajibika ipasavyo na kuhakikisha taarifa za Ukatili zinawafikia polisi kwa wakati ili hatua zichukuliwe.

“ Kuna kazi nzuri inafanywa na jeshi la Polisi, lakini tunahitaji kuwapa ushurikiano wa kutosha ili hata wale wanaokeketa wasichana wa shule tutoe taarifa zao mapema na hatua zitachukuliwe” alisema Juma.

Kwa mujibu wa jamii zinazofanya ukeketaji, mwaka huu 2018 ni mwaka wa Ukeketaji ambapo kwa Dar es salaam, kata za Kivule, Kitunda, Kipunguni, mzinga, Msongola, Pugu na Chanika zinatajwa kuwa na idadi kubwa ya watoto walio hatarini kukeketwa ifikapo Novemba.