BODI YA WAKURUGENZI TTCL YAAHIDI MAKUBWA KWA T-PESA

Mwenyekiti mpya wa Bodi ya Wakurugenzi wa TTCL PESA (T-PESA), Bw. Richard Mayongela akizungumza katika uzinduzi huo uliofanyika kwenye Hoteli ya Johari Rotana jijini Dar es salaam Mei 9, 2024.

Mwenyekiti wa Bodi ya Wakurugenzi ya Shirika la Mawasiliano Tanzania (TTCL) Zuhura Muro akikabidhi vitendeakazi kwa Mwenyekiti mpya wa Bodi ya Wakurugenzi wa TTCL PESA (T-PESA) Richard Mayongela katika ni Linnah Igogo kutoka Ofisi ya Msajili wa Hazina wakati wa uzinduzi wa Bodi ya Wakurugenzi ya TTCL PESA LTD (T-PESA) kwenye hoteli ya Johari Rotana jijini Dar es Salaam Mei 9, 2024.

    

BODI ya Wakurugenzi ya Shirika la Mawasiliano Tanzania (TTCL) imeihakikishia TTCL PESA LTD (T-PESA) kuwa wataipa ushirikiano pamoja na mahitaji ya rasilimali ili kuhakikisha inafanya kazi kwa kuzingatia sheria za fedha za ndani na nje ya nchi huku ikijikita katika ubunifu wa biashara na utendaji katika kutoa huduma za kidijitali.

Kauli hiyo imetolewa na Mwenyekiti wa Bodi ya Wakurugenzi ya Shirika la Mawasiliano Tanzania (TTCL Corporation), Bi. Zuhura Muro jijini Dar es Salaam kwenye hafla ya uzinduzi wa Bodi ya Wakurugenzi ya TTCL PESA LTD (T-PESA) pamoja na Bodi ya Wadhamini ya T-PESA.

Aliitaka bodi hiyo, kuwa na mtazamo mpana pamoja na ubunifu wa biashara na utendaji ili kuleta matokeo chanya katika Shirika hilo, kwa kuzingatia ushindani wa kibiashara uliopo.

"Kazi hii inahitaji umakini, weledi na hekima kubwa ili kufikia malengo na maono ya T-PESA, Mpango mkakati wa mwaka 2022/2026/27 unaotekelezwa utachochea mafanikio na kufanya mapinduzi makubwa ya teknolojia na uchumi wa kidijitali katika kutoa huduma za kifedha na malipo ndani na nje ya Nchi…,” alisema Bi. Muro.

Amewataka wajumbe na watendaji kuongeza ubunifu wa bidhaa pamoja na huduma zinazotolewa kwa wateja ili kukuza uchumi wa kidijitali, kutanua wigo wa kibiashara na kuongeza faida pamoja na hisa ili kutoa gawio kwa Serikali kwa mujibu wa maono ya Shirika.

“...Jukumu kubwa la Bodi ya Wakurugenzi ya TTCL PESA na Bodi ya Wadhamini ni kuikuza kampuni hiyo tanzu na kuiweka katika misingi ya kupanua wigo wa shughuli zake ndani na nje ya nchi na kuifanya kuwa kiungo muhimu cha malipo ya kidijitali ndani ya Afrika na dunia nzima kwa kuwa biashara hiyo haina mipaka,”

Pamoja na hayo, amewashukuru na kuwapongeza wafanyakazi wa Shirika hilo kwa kuwa na utulivu na hamasa ya kufanya kazi kwa uzalendo.

Kwa upande Mkurugenzi Mkuu wa Shirika la Mawasiliano Tanzania (TTCL) Mhandisi, Peter Ulanga amesema lengo kuu ni kuhakikisha Shirika kupitia kampuni Tanzu ya T-PESA inajiweka vizuri katika utoaji wa huduma za miamala ya simu ndani na nje ya nchi ya Tanzania.

"Tuna imani na Bodi hii mpya tutaweza kuongeza usikivu wa huduma zetu ndani na nje ya Nchi kwa kuwa T-PESA ina uwezo wa kutoa huduma za kifedha ndani na nje ya Nchi...tunakwenda kidijitali zaidi.” Amesema Mkurugenzi Mkuu wa Shirika la TTCL, Mhandisi, Ulanga.

Mwenyekiti mpya wa Bodi ya Wakurugenzi wa TTCL PESA (T-PESA), Bw. Richard Mayongela alisema bodi hiyo imejipanga kutimiza maono ya Shirika hilo kwa kutoa huduma bora za Fedha mtandao ndani ya nje ya mipaka ya Tanzania.

Mayongela amesema, ndani ya miaka mitano ijayo T-PESA itakuwa katika ramani nzuri ikiwemo kutoa huduma za kifedha kidijitali kimataifa na wameanza kuzungumza na wadau mbalimbali wakiwemo UDART na tayari wametengeneza kamati ya ukaguzi kwa utekelezaji zaidi.