WATU WASIOJULIKANA WAMSHAMBULIA MBOWE USIKU DODOMA

Mwenyekiti wa Chama cha Demokrasia na Maendeleo (Chadema), Freeman Mbowe akiwa amelazwa katika Hospitali ya DCMC Ntyuka, Dodoma.

Naibu Spika, Dkt Tulia Ackson akiwasili katika Hospitali ya DCMC Ntyuka kumjulia hali M/Kiti wa Chadema na Kiongozi wa Upinzani Bungeni, Freeman Mbowe aliyelazwa katika hospitali hiyo akipatiwa matibabu.

Na Mwandishi Wetu, Dodoma

MWENYEKITI wa Chama cha Demokrasia na Maendeleo (Chadema), Freeman Mbowe ameshambuliwa na watu wasiojulikana usiku wa kuamkia leo. Taarifa zinasema kashambuliwa na watu hao wasiojulikana na kumjeruhi alipokuwa akirejea nyumbani kwake Jijini Dodoma. Mwenyekiti huyo amelazwa katika Hospitali ya DCMC Ntyuka akipatiwa matibabu.

Tayari Jeshi la Polisi mkoani Dodoma limethibitisha kushambuliwa na kujeruhiwa kwake usiku wa kuamkia leo nyumbani kwake jijini Dodoma. Akizungumza na wandishi wa habari leo Kamanda wa Polisi Mkoa wa Dodoma, Gilles Muroto amesema taarifa za Mbowe kushambuliwa na watu wasiojulikana walizipata asubuhi ya leo kupitia kwa Mbunge wa Viti Malum wa Chama hicho.

Muroto amesema tayari Jeshi la Polisi limeshaanza kufanya uchunguzi wa tukio hilo huku akiwaonya watu wanaosambaza taarifa za uongo pamoja na kupiga marufuku mikusanyiko yoyote isiyo halali.

"Tumepata taarifa za kuwepo kwa wanachama wa Chadema waliopanga kukusanyika kwenye ofisi za Chama cha hapa Dodoma, niwaonye kwamba Jeshi la Polisi halitoruhusu mikusanyiko kinyume na sheria na utaratibu.

Lakini pia tumelichukulia tukio hili kama tukio lingine la uhalifu na tayari tumeshaanza uchunguzi wetu, niwaonye wale wanaotaka kulitumia tukio hili kisiasa," amesema Muroto.