ZAA, UCHUKUZI SC WATAKIWA KUDUMISHA USHIRIKIANO

 

1.   Mchezaji wa timu ya Wanawake ya kuvuta Kamba ya Uchukuzi SC, Bi. Rachel Manyilizu (kulia) akipokea kombe la ubingwa kutoka kwa Katibu Mkuu Wizara ya Vijana, Utamaduni, Sanaa na Michezo, Mhe. Omar Hassan ‘King’ baada ya kuwavuta wenzao wa Mamlaka ya Viwanja vya Ndege Zanzibar (ZAA), katika mchezo wa bonanza lililofanyika hivi karibuni kwenye Viwanja vya Maisara Zanzibar.

1.   Wanamichezo wakipita kwa furaha mbele ya mgeni rasmi wa bonanza la michezo mbalimbali, Mhe. Omar Hassan ‘King’, ambaye ni Katibu Mkuu wa Wizara ya Vijana, Utamaduni, Sanaa na Michezo. Bonanza hilo limeandaliwa na Mamlaka ya Viwanja vya Ndege Zanzibar (ZAA) na kuialika Klabu ya Uchukuzi iliyopo chini ya Wizara ya Ujenzi, Uchukuzi na Mawasiliano (Sekta ya Uchukuzi) ya Tanzania Bara na lilifanyika hivi karibuni kwenye viwanja vya Maisara.

Na Mwandishi Wetu, Zanzibar

MAMLAKA ya Viwanja vya Ndege Zanzibar (ZAA) imetakiwa kuendelea kudumisha ushirikiano katika michezo na Klabu ya Michezo ya Uchukuzi ya Wizara ya Ujenzi, Uchukuzi na Mawasiliano (Sekta ya Uchukuzi). Katibu Mkuu wa Wizara ya  Vijana, Utamaduni, Sanaa na Michezo, Mhe. Omar Hassan ‘King’ ametoa kauli hiyo hivi karibuni kwenye bonanza la michezo mbalimbali lililoandaliwa na ZAA na kufanyika hivi karibuni kwenye viwanja vya Maisara na Gymkhana Zanzibar.

Mhe. King amesema sasa umefika wakati kwa Wizara na taasisi za Tanzania Bara na Visiwani kushirikiana katika michezo ili kudumisha undugu na ujamaa, kwani kwa sasa michezo maarufu ya Pasaka imeanza kulegalega na haifanyi vyema.

“Nimefurahi sana kwa bonanza hili hasa kwa kuwaleta wenzetu kutoka Tanzania Bara, na ninazishauri serikali zote mbili kuweza kuangalia na kuhakikisha wanarejesha michezo yenye mashirikiano kama ile ya Pasaka na mingine ipewe nafasi na kushirikisha wachezaji wa pande zote mbili,” Amesema sera ya michezo inazungumzia kuwepo kwa michezo katika Wizara na taasisi zake.

Mhe King amesema serikali ya Mapinduzi ya Zanzibar imejiimarisha kwenye michezo kwa takribani miaka mitatu iliyopita kwa kupitia ilani ya chama tawala na iliahidi kujenga na kuimarisha viwanja vya michezo na sheria za vyama vya michezo na wameweza kuboresha viwanja vya Amani, Gombani na Mao Zao tung.

Hatahivyo, ameipongeza ZAA kwa kuandaa bonanza hilo lililoshirikisha wachezaji kutoka Wizara ya Ujenzi, Uchukuzi na Mawasiliano (Sekta ya Uchukuzi) na kushindanisha michezo zaidi ya 10, na kutaka liwe endelevu kwa kualikana ikiwa ni pamoja na kupeana zamu ya uandaaji wa kila mwaka.

“Namna ZAA walivyoandaa bonanza hili imeweza kuwazidi ZBC sio kwamba ninaisifu ZBC kwa kuwa niliwahi kuifanyia kazi, bali walikuwa wamejiimarisha na kuingia mitaani na kuanzisha kombe la ZBC Mapinduzi la watoto, na sasa wanakombe linaitwa Yamleyamle,” amesema.

Amesema Zanzibar inamichezo 36 na kati ya hiyo 32 inafanya vizuri na minne imepoteza mwelekeo kwa kufanya vibaya, ambapo pia kumeundwa timu na vyama vingi vya michezo.

“Michezo na utamaduni ndio vilivyochangia kuleta Mapinduzi ya Zanzibar, kwani timu ya African Sport kupitia vikundi vya asili vilivyokuwa maeneo ya Mwembe Msonge, wananchi walikutana na kucaguzana na kuleta Mapinduzi hayo Januari 12,” amesema,

Mhe. King amesema michezo inadumisha undugu, urafiki na afya kwani katika michezo hakuna uhasama na huleta upendo baina ya wanamichezo, hivyo amewataka wanamichezo na wananchi kwa ujumla kuendelea kujikita katika kucheza michezo mbalimbali.

Amesema Zanzibar inahistoria kubwa katika michezo na ilianza tangu mwaka 1875 kwenye viwanja vya Maisara ambapo awali paliitwa Mnazi Mmoja, na palianzishwa kwa sheria maalum. Katika mwaka 1875-1879 Manuari za Ujerumani na Uingereza walitumia viwanja hivyo kwa ajili ya michezo, kwa kuwa wao ndio waliokuwa wakicheza na sio Waafrika.

Hatahivyo, amesema Serikali itaweka mazingira bora kwa kuhakikisha klabu za serikali zinapata nafasi na kuweza kuwezeshwa kushiriki katika michezo mbalimbali.

Naye Naibu Katibu Wizara ya Ujenzi, Mawasiliano na Usafirishaji, Mhandisi Shomari Omar Shomari, amesema bonanza hili la michezo ni moja ya maagizo ya viongozi wa juu la kuwataka kuwa na ushirikiano baina ya Tanzania Bara na Zanzibar.

“Kwa upande wa ZAA na wageni wetu bonanza hili linamanufaa zaidi kwani wafanyakazi wenu wanafanyakazi saa 24, hivyo wanahitaji kupumzisha akili na mwili, kwani hili bonanza sio anasa bali ni sehemu ya maisha yetu kwa kuweka afya zetu vizuri, na ili tuwahudumie vizuri abiria wanaosafiri kwa ndege mnatakiwa kuwa na furaha na nguvu wakati wote,” amesema.

Mhandisi Shomari amesema kuanzia sasa bonanza hili litafanyika kila mwaka kwa ngazi ya Wizara.

Naye Mkurugenzi wa Viwanja wa ZAA, Bi. Zaina Mwalukuta amesema ZAA inalengo la kudumisha ushirikiano na wenzao wa Mamlaka ya Viwanja vya Ndege Tanzania (TAA) na taasisi nyingine zinazohusiana na usafiri wa anga.

“Tunaomba ushirikiano huu uendelee kila mwaka kwani bonanza litadumisha undugu na ujamaa, na kuboresha afya ili kujiepusha na magonjwa yasiyoambukiza yakiwemo Kisukari, shinikizo la damu na kupelekea kupata kiarusi, kwani wanamichezo watakuwa wakifanya mazoezi mara kwa mara,”. Amesema Bi. Mwalukuta.

Hatahivyo, amesema katika miaka ya 1980 na 90 michezo ilichukua nafasi kubwa katika mashirika ya umma, lakini kwa sasa michezo hiyo imekufa na kubaki katika vyombo vya ulinzi na usalama na baadhi ya mitaa pekee.

Amesema ZAA itaendelea kuziunga mkono taasisi zinazoendeleza michezo, lakini pia ameitaka wizara inayohusiana na michezo kuwasilisha ombi lao kwa serikali Kuu la kutenga fungu maalum na muda kwa ajili ya ushiriki wa michezo.

Kwa upande wa mmoja wa viongozi wa Uchukuzi SC, Bw. Joseph Peter amesema wamejifunza mengi kutoka kwa wenyeji wao ZAA, ambapo mojawapo ni ushirikiano na upendo wa hali ya juu walionao, na sasa ameomba ushirikiano huo udumu kwa kuanzishwa kwa mabonanza ya mara kwa mara kwani michezo ni afya na itasaidia wafanyakazi kufanya kazi kwa weledi wakiwa na afya njema.

“Sasa inahitajika nguvu ya dhati kwa kuhakikisha mashirika yaliyokuwa na nguvu katika michezo yanashirikishwa kwenye michezo kwa kuandaliwa Kombe na yafanyike mashindano na mshindi akabidhiwe kombe ili mradi kuleta mashirikiano na watumishi wengine wa Umma na Binafsi”.