USAHIHI UTABIRI TAARIFA ZA HALI YA HEWA UMEVUTIA WANANCHI WENGI - TMA

Mkurugenzi Mkuu wa Mamlaka ya Hali ya Hewa nchini (TMA), Dk. Agnes Kijazi akizungumza kwenye semina ya TMA iliyoandaliwa maalum kwa waandishi wa habari.

Mkurugenzi Mkuu wa Mamlaka ya Hali ya Hewa nchini (TMA), Dk. Agnes Kijazi akizungumza kwenye semina ya TMA iliyoandaliwa maalum kwa waandishi wa habari.

 

MAMLAKA  ya Hali ya Hewa nchini (TMA) imesema tathmini zao zinaonesha kwa sasa wananchi wananchi wengi wamepata mwamko wa kufuatilia taarifa za utabiri wa hali ya hewa jambo ambalo ni zuri kwani zinasaidia kupunguza madhara yanayoweza kutokea wakati wa mabadiliko anuai ya hali ya hewa.

Kauli hiyo imetolewa leo na Mkurugenzi Mkuu wa Mamlaka ya Hali ya Hewa nchini (TMA), Dk. Agnes Kijazi kwenye semina ya TMA iliyoandaliwa maalum kwa waandishi kuwanoa juu ya masuala mbalimbali ya hali ya hewa.

Akifafanua zaidi, Dk. Kijazi alisema tathimini zao zinaonesha wananchi wamekuwa wakifuatilia taarifa za utabiri wa hali ya hewa tofauti na ilivyokuwa hapo awali jambo ambalo linasababishwa na viwango vya usahihi wa taarifa zao.

Alisema taarifa za hali ya hewa zina umuhimu mkubwa sana kwa jamii hasa katika sekta mbalimbali zikiwemo za Kilimo, afya, miundombinu na zinginezo hasa kuelekea msimu mpya wa utabiri.

"Taarifa za hali ya hewa ni muhimu sana kwa Jamii katika kila sekta, ukizungumzia uchumi wa viwanda lazima utahitaji taarifa za hali ya hewa na hata katika sekta zingine kama vile, Kilimo, Afya, Mifugo, Nishati, Usafiri wa anga, usafiri wa kwenye maji, usafiri wa nchi kavu, Utalii na Maliasili, elimu na sekta nyingine nyingi," alisema Dk. Kijazi.

Aidha aliongeza kuwa wananchi wengi kwa sasa  wanafahamu na kufuatilia utabiri wa hali ya hewa kwa sababu unawasaidia katika shughuli zao.