KADA WA CCM MWILINGE AJITOSA KUMVAA WAZIRI LUKUVI JIMBO LA ISIMANI

 Kada wa Chama Cha Mapinduzi (CCM), Wilaya ya Iringa vijijini, Adestino Mwilinge akijitosa kugombea Jimbo la Isimani.

NA FREDY MGUNDA, IRINGA

MBUNGE wa Jimbo la Isimani William Lukuvu ameanza kupata upinzani katika jimbo hilo baada ya kada  wa CCM, Adestino Mwilinge kutangaza nia ya kuchukua fomu ya kuomba ridhaa ya kugombea  ubunge jimboni humo.

Akizungumza na waandishi wa habari katika Kijiji cha Mbuyuni kada huyo alisema ameamua kutia nia kwa mujibu wa kanuni na katiba ya chama hicho inavyosema kila mwananchama anahaki ya kuchaguliwa na kuchagua (ibara ya 14 (3) na 15 (1)).

Alisema kuwa ameamua kwenda kutia nia akiwa kijijini kwao ili wadau watambue kuwa yeye ni mkazi halali wa Jimbo la Isimani na anania ya dhati ya  kusaidia kuleta maendeleo kwa wananchi wanaishi katika jimbo hilo.

Mwilinge alisema ameamua kutia nia baada ya Katibu Mkuu wa Chama Cha Mapinduzi, Dk. Bashir Kakurwa kutangaza wanachama wa chama hicho kuwa wanaruhusiwa kutia nia kwa sasa kwani ni wajibu wao kulingana na katiba ya chama hicho.

Aliongeza kuwa anaunga mkono juhudi zinazofanywa na Rais wa Jamhuri ya Muungano wa Tanzania, Dk. John Pombe Magufuli kwa kazi kubwa aliyoifanya ya kuleta maendeleo ya nchi katika kipindi hiki cha miaka mitano ikiwa madarakani.

Kada huyo aliyehudumu katika Chama Cha Mapinduzi kwa zaidi ya miaka kumi na tano akiwa katika uongozi wa nyadhifa ndani ya chama chake.

Mwilinge alisema kwa sasa hawezi kueleza sababu iliyomfanya kuomba ridhaa ya kuteuliwa kuwa mgombea wa Jimbo la Ismani, japokuwa ameahidi kuweka wazi vipaumbele vyake muda utakapofika.

Aidha Mwilinge alisema kuwa wanachama wa CCM wanawajibu wa kukilinda chama hicho kwa kuisimamia vizuri Serikali na kutangaza mambo mazuri yanayofanywa na chama.