Wednesday, 7 August 2019

Home Kitaifa MATUKIO PICHA SERIKALI KUOKOA FEDHA ZA UMMA KWA KUJINASUA KWA MAWAKALA WA UNUNUZI WA MAGARI

SERIKALI KUOKOA FEDHA ZA UMMA KWA KUJINASUA KWA MAWAKALA WA UNUNUZI WA MAGARI

JOE MUSHI August 07, 2019 Kitaifa, MATUKIO PICHA,

Naibu Katibu Mkuu wa Wizara ya Fedha na Mipango, Dkt. Khatibu Kazungu, akiwataka watumishi wa Wakala wa Huduma ya Ununuzi Serikalini- GPSA, kufanya kazi kwa weledi, alipofanya ziara ya kikazi katika taasisi hiyo jijini Dar es Salaam, kubaini changamoto za utekelezaji wa bajeti yake ya mwaka 2018/19 na njia za kuzitatua.

Afisa Mtendaji Mkuu wa Wakala wa Huduma ya Ununuzi Serikalini- GPSA, Dkt. Geraldine Rasheli, akieleza changamoto za utekelezaji wa bajeti ya mwaka 2018/19, hususani kwenye miundombinu ya kuhifadhi mafuta, wakati wa ziara ya kikazi ya Naibu Katibu Mkuu wa Wizara ya Fedha na Mipango, Dkt. Khatibu Kazungu (hayupo pichani), katika ofisi za taasisi hiyo, jijini Dar es Salaam.

Na Peter Haule, Dar es Salaam

SERIKALI inaangalia njia mbadala ya ununuzi wa magari yake kwa kwenda moja kwa moja kiwandani bila kupitia kwa mawakala kutokana na gharama kuwa juu na hazitabiliki.

Hayo yalibainishwa na Naibu Katibu Mkuu wa Wizara ya Fedha na Mipango, Dkt. Khatibu Kazungu, alipofanya ziara ya kikazi katika Ofisi za Wakala wa Huduma ya Ununuzi Serikalini (GPSA), jijini Dar es Salaam kwa ajili ya kubaini changamoto na mafanikio ya utekelezaji wa bajeti ya mwaka 2018/19 kwa taasisi hiyo.

Dkt. Kazungu alisema kuwa, ununuzi wa magari ya Serikali unatumia gharama kubwa kutokana na kuwatumia Mawakala wa Ununuzi ambao bei zao ni za juu na zinabadilika mara kwa mara, hivyo kuna haja ya kwenda moja kwa moja kiwandani ili kuokoa fedha za walipakodi zinazopotea.

Aidha Serikali inaangalia namna itakavyo boresha miundombinu ya GPSA hasa kwa kuwekeza katika Visima vya mafuta ili kuwa na mafuta ya kutosha hivyo kusaidia kuongeza ufanisi katika kuhudumia magari ya Serikali.

Kwa upande wake Afisa Mtendaji Mkuu wa GPSA, Dkt. Geraldine Rasheli, alimshukuru Dkt. Kazungu, kwa kutembelea taasisi yake na kuahidi kuyafanyia kazi maagizo yaliyotolewa ili kupunguza malalamiko katika utoaji huduma na kuongeza tija kwa Taifa.

Naibu Katibu Mkuu wa Wizara ya Fedha na Mipango Dkt. Kazungu, anaendelea na ziara ya kikazi katika taasisi zilizo chini ya Wizara hiyo, kuangalia changamoto za utekelezaji wa bajeti ya mwaka 2018/19 na njia za kuzitatua kwa bajeti ya mwaka 2019/20.