KIAPO WAKUU WA WILAYA TANGA, RC MALIMA 'AWAFUNDA' AWATAKA KUCHAPA KAZI

Mkuu wa wilaya ya Lushoto Kalist Lazaro akila kiapo mbele ya Mkuu wa Mkoa wa Tanga Adam Malima mapema leo jijini Tanga picha na Ahmed Mahmoud Tanga.

Picha ya pamoja ya Mkuu wa Mkoa na wakuu wa wilaya wapya na viongozi wengine baada ya kuapishwa.

MKUU wa Mkoa wa Tanga Adam Kighoma Malima amewaapisha wakuu wa Wilaya wapya wapatao wanne kati ya nane walioteuliwa na Mh. Rais wa Jamhuri ya Muungano wa Tanzania, Samia Suluhu Hassan. Wakuu hao walioamishishwa vituo vya kazi na kwenda katika Wilaya za Tanga ni pamoja na Hashim Mgandilwa Mkuu wa Wilaya Tanga, Ghaibu Bullet Lingo, Mkuu wa Wilaya ya Pangani, Mh Abel Yeji Busalama, Mkuu wa Wilaya Kilindi na Mh Siriel Shaidi Nchembe, Mkuu wa Wilaya Handeni.

Wapya ni Basila Kalubha Mwanukuzi, Mkuu wa Wilaya Korogwe, Kalisti Lazaro Bukhay, Mkuu wa Wilaya Lushoto, na Halima Abdallah Bulembo kuwa Mkuu wa Wilaya ya Muheza mkoani Tanga.

Akizungumza mara baada yakuwaapisha wakuu hao wa Wilaya Mh. Malima amewasisitiza wakuu wa Wilaya wote kufanya kazi kwa bidii, kufuata maadili, kujiepusha na vitendo vya rushwa, unywaji wa pombe kupitiliza na kuvaa mavazi ya heshima katika shughuli zao zote.

Aidha kwa mujibu wa Malima aliwataka kutokutembea na watoto wa shule na wenye umri mdogo pia kujifanya miungu watu na kuchukua mali za wananchi kwa kutumia nguvu kinyume na maadili ya uongozi.

Amesisitiza pia wakuu wa Wilaya kujikita katika kutatua migogoro ya wananchi kuafuata katika makazi yao na sio kusubiri viongozi wa juu kufika katika Wilaya zao pia kusimamia kilimo kwani mkoa wa Tanga unategemea kilimo kwa kiasi kikubwa.

Aliwataka Kuakikisha halmashauri zote zinakusanya mapato ya kutosha na kusaidia jamii ikiwemo vijana na kina mama kupata asilimia kumi zilizowekwa kisheria na kusaidia katika kujikimu na maisha na mikopo ya riba nafuu.

Kwa upande wao wakuu wa Wilaya walioapishwa na kula kiapo wamesema kwamba wapo tayari kuwatumikia wananchi na kufuata maadili ya utumishi wa umma na sio vinginevyo na kamwe hawatamuangusha Mh.Rais.

Akiongea Mara baada ya Kuapishwa mapema Asubuhi Kalisti Lazaro Mkuu wa Wilaya ya Lushoto amesema Wilaya yake itahakikisha inakuwa kwa kasi hususani katika sekta ya elimu afya na miundo mbinu ya barabara pamoja
na Wilaya kuwa na maendeleo ya haraka kwa kutumia ilani ya chama cha mapinduzi ambayo walielezea kwa wananchi kutatua matatizo yote yanaowakabili.