MBUNGE UMMY MWALIMU ATAKA UMOJA NA MSHIKAMANO KWA MADIWANI WA JIJI LA TANGA

Mbunge wa Jimbo la Tanga (CCM) Ummy Mwalimu akizungumza wakati wa kikao cha Uchaguzi wa mgombea nafasi ya Meya wa Jiji la Tanga.

Meya Mpya Mstahiki Abdurahman Shillow akizungumza katika kikao hicho mara baada ya kuchaguliwa kushika wadhifa huo.

Meza kuu wakifuatilia matukio mbalimbali kwenye uchaguzi huo katikati ni Mbunge wa Jimbo la Tanga (CCM) Ummy Mwalimu kulia ni Mbunge wa Viti Maalumu Mkoa wa Tanga Mhandisi Mwanaisha Ulenge  na kushoto ni Mkuu wa Wilaya ya Tanga Thobias Mwilapwa.

Mwenyekiti wa CCM wilaya ya Tanga Meja Mstaafu Mkoba akizungumza na waheshimiwa madiwani kabla ya kuanza uchaguzi huo.

Mbunge wa Jimbo la Tanga (CCM) Ummy Mwalimu kulia akiwa na Mstahiki Meya mpya wa Jijini la Tanga (CCM) Abdurahaman Shillow kushoto na anayefuatia ni Mbunge wa Viti Maalumu Mkoa wa Tanga (CCM) Mhandisi Mwanaisha Ulenge.

MBUNGE wa Jimbo la Tanga Mjini, Mhe Ummy Mwalimu amehimiza umoja na mshikamano baina ya madiwani wa Halmashauri ya Jiji la Tanga ili kuweza kuwatumikia vyema wananchi wa Jiji la Tanga.

Ummy ameyasema hayo katika kikao cha Uchaguzi wa mgombea nafasi ya Meya wa Jiji la Tanga ambapo ameeleza  kuwa uchaguzi umekwisha na wananchi wa Tanga Mjini wamewaamini  kwa kuwapa ushindi mkubwa kwa mgombea Urais, Ubunge na Madiwani wa CCM katika kata zote 27 za Tanga Mjini.

 

Alisema baada ya uchaguzi huo kumalizika viongozi hao wana wajibu wa kuwatumikia wananchi wa Tanga mjini bila kuchoka ili kuleta maendeleo yao na hatimaye kuweza kuchochea kasi ya ukuaji wa uchumi.

Mhe Ummy amempongeza Meya Mpya Mstahiki Abdurahman Shillow kwa kuaminiwa kuwa Mstahiki Meya wa Jiji la Tanga huku akihaidi kumpa ushirikiano wakati wote wa utekelezaji wa majukumu yake.

Katika uchaguzi huo uliofanyika katika Ukumbi wa Ofisi za Mkuu wa Mkoa Tanga ulisimamiwa na Mkuu wa Wilaya ya Tanga Thobias Mwilapwa.

 

Akitangaza matokeo hayo Mwilapwa alimtangaza Mhe Abdurahmani Shillow ambaye ni Diwani wa Kata ya Mzingani ambaye ni  mgombea Umeya wa Jiji la Tanga kwa kupata kura 26 huku nafasi ya pili ikienda kwa Mhe Said Mbaruku ambae amepata kura 11 wakati Mhe Ahmed Mwinjanga amepata kura 1 katika idadi ya wapigakura walikuwa 38.