TANROADS YATAKIWAA KULETA MAPENDEKEZO YA NYONGEZA YA MRADI

Kaimu Meneja wa Wakala wa Barabara (TANROADS), mkoa wa Katavi Mhandisi Martin Mwakabende, akitoa taarifa kwa Katibu Mkuu wa Wizara ya Ujenzi, Uchukuzi na Mawasiliano (Sekta ya Ujenzi), Mhandisi Joseph Nyamhanga, kuhusu hatua zilizofikiwa katika ujenzi wa barabara ya Mpanda-Vikonge yenye urefu wa KM 35 kwa kiwango cha lami, mkoani humo.

KATIBU Mkuu wa Wizara ya Ujenzi, Uchukuzi na Mawasiliano (Sekta ya Ujenzi), Mhandisi Joseph Nyamhanga, ameuagiza Wakala wa Barabara (TANROADS), kuhakikisha wanatuma mapendekezo Wizarani ili barabara ya Mpanda -Vikonge yenye urefu wa KM 35 inayojengwa kwa kiwango cha lami iongezwe urefu  wa KM 3.

Katibu Mkuu huyo amesema  hivyo lengo likiwa ni kuifikisha barabara hiyo katika kijiji cha Vikonge badala ya kuishia porini.

Agizo hilo amelitoa mkoani Katavi, mara baada ya kukagua ujenzi wa barabara  hiyo  inayojengwa na mkandarasi China  Railway Seventh Group kwa gharama ya shilingi zaidi ya bilioni 57 ikiwi ni fedha za Serikali ya Jamhuri ya Muungano wa Tanzania kwa asilimia 100.

"Nimeridhishwa na hatua zinazoendelea za ujenzi lakini barabara hizi zinajengwa kwa ajili ya wananchi hivyo lazima  ujenzi wake uwanufaishe wananchi hao kwa kufika katika kijiji chenyewe", amesema Mhandisi Nyamhanga.

Amesema ujenzi wa barabara hiyo umefikia asilimia 66 ambapo mpaka sasa KM 15 zimeshakamilika kwa kiwango cha lami na kazi zingine zinaendelea kukikamilisha kipande kilichobaki.

Aidha, Mhandisi Nyamhanga amefafanua kuwa  mradi huu umetoa huduma kwa wananchi wake kwa kuwajengea visima vya maji  pamoja na matenki ya uwezo mkubwa wa kubeba maji katika shule mbili za sekondari.

"Mradi huu ni mfano mzuri kwa miradi mingine tutaangalia namna ya kuweka katika mikataba huduma kama hizo kwa jamii", amesisitiza Mhandisi Nyamhanga.

Kwa upande wake, Kaimu Meneja wa TANROADS mkoa wa Katavi, Mhandisi Martin Mwakabende, amesema kuwa atamsimamia mkandarasi huyo kukamilisha sehemu iliyobaki kwa viwango na ubora uliopangwa.

Mradi wa ujenzi wa barabara ya Mpanda-Vikonge ni sehemu ya barabara kuu ya Ukanda wa Magharibi yenye urefu wa KM 1042 ambapo Sera ya Serikali ya Awamu ya Tano ni kuhakikisha inaunganisha mikoa yote nchini kwa barabara za lami pamoja na nchi jirani.

Imetolewa na Kitengo cha Mawasiliano Serikalini, Wizara ya Ujenzi, Uchukuzi na Mawasiliano.