VIONGOZI WA DINI KAGERA WAMUOMBEA RAIS SAMIA, BASHUNGWA AWASILISHA MCHANGO HARAMBEE UJENZI WA KANISA ANGLIKANA

 

Waziri wa Ujenzi, Innocent Bashungwa (Mb) akizungumza na Viongozi na waumini katika Ibada ya Shukrani ya Miaka 12 ya Uchungaji wa Askofu Grayson Mutegeki Katunzi pamoja na Harambee ya Ujenzi wa Kanisa iliyoambatana na Ibada ya Kumuombea Rais, Mhe. Dkt. Samia Suluhu Hassan, Viongozi wa Kitaifa na Serikali katika Viwanja vya Kanisa Anglikana Mt. Yohana, Dayosisi ya Lweru – Muleba, Kagera. Julai 28, 2024.

Waziri wa Ujenzi, Innocent Bashungwa (Mb) akiwa na Mkuu wa Mkoa wa Kagera, Hajat Fatma Abubakari Mwassa pamoja Mbunge wa Jimbo la Muleba Kaskazini, Charles Mwijage na Viongozi wengine katika Ibada ya Kumuombea Rais, Mhe. Dkt. Samia Suluhu Hassan, Viongozi wa Kitaifa na Serikali katika Viwanja vya Kanisa Anglikana Mt. Yohana, Dayosisi ya Lweru – Muleba, Kagera. Julai 28, 2024.

Viongozi wa Dini ambao ni Sheikh wa Wilaya ya Muleba, Abdulaziz Bin Isihaka (Katikati), Mhashamu Godfrey Mbelwa Kibuka, Askofu wa Anglikana Dayosisi ya Lweru - Muleba na Mchungaji Philemon Kagimbo - Mwakilishi wa Baba Askofu KKKT Dayosisi ya Kaskazini Magharibi wakiwa katika Ibada ya Kumuombea Rais, Mhe. Dkt. Samia Suluhu Hassan, Viongozi wa Kitaifa na Serikali katika Viwanja vya Kanisa Anglikana Mt. Yohana, Dayosisi ya Lweru – Muleba, Kagera. Julai 28, 2024.

VIONGOZI wa Dini wa Mkoa wa Kagera wameungana kwa pamoja kumuombea Rais wa Jamhuri ya Muungano wa Tanzania, Mheshimiwa Dkt. Samia Suluhu Hassan, Viongozi wa Kitaifa na Serikali kwa kuendelea kudumisha Amani, Utulivu, Upendano na Maelewano.

Ibada hiyo iliyowakutanisha viongozi wa Dini ya Kikristo na Kiislamu imefanyika leo Julai 28, 2024 katika Kanisa Anglikana Mt. Yohana Kimbugu - Muleba, Kagera iliyoambatana na Ibada ya Shukrani ya Miaka 12 ya Uchungaji wa Askofu Grayson Mutegeki Katunzi pamoja na Harambee ya Ujenzi wa Kanisa.

Akiongoza Ibada hiyo, Askofu wa Dayosisi ya Lweru Kanisa la Anglikana Tanzania, Godfrey Mbelwa amesema viongozi wa Dini na Waumini wana wajibu wa kuwaombea viongozi wa Kitaifa kwani wanafanya kazi kubwa ya kuwaletea wananchi Maendeleo.

“Tunawaombea Viongozi wetu kuanzia Rais wa Jamhuri ya Muungano wa Tanzania, Dkt. Samia Suluhu Hassan, Bunge, Mahakama, Jeshi, Ulinzi na Usalama na wote wenye mamlaka mbalimbali katika nchi hii”- amesema Askofu Godfrey katika maombi yake. 

Kwa upande wake, Waziri wa Ujenzi Innocent Bashungwa ambaye amemwakilisha Waziri Mkuu Kassim Majaliwa amewashukuru viongozi wa Dini kwa kuandaa maombi ya kumuombea Rais, Dkt. Samia Suluhu Hassan yaliyoambatana na Harambee ya Ujenzi ya wa Kanisa Parishi ya Kimbugu, Muleba mkoani Kagera. 

“Serikali ya Awamu ya sita inaendelea kujenga mshikamano, umoja kwa kushirikiana na viongozi wa dini ili kuhakikisha jamii ya Watanzania inakuwa hofu ya kumuogopa Mwenyezi Mungu na kumtii”, amesisitiza Bashungwa.

Katika Harambee ya Ujenzi wa Kanisa, Waziri Bashungwa amewasilisha mchango wa Viongozi wa Serikali, jumla ya Shilingi Milioni 30 na kuahidi kuendelea kushirikiana na viongozi wa Kanisa hilo ili ujenzi ukamilike kwa wakati.

Naye, Mkuu wa Mkoa wa Kagera Fatma Mwassa amewaomba viongozi wa Dini kuendelea kuwasihi waumini kuwa wacha Mungu ili kuwa na hofu ya kutenda maovu kwenye jamii ikiwemo mauaji na ukatili wa kijinsia.