NMB YASAIDIA MABENCHI YA MILIONI 10 MUHIMBILI

Meneja wa Benki ya NMB Kanda ya Dar es Salaam na Zanzibar, Badru Idd (wa pili kulia) akimkabidhi sehemu ya mabenchi 52 Kaimu Mkurugenzi wa Tiba, Hospitali ya Taifa Muhimbili, Dk. John Lwegasha. NMB imetoa msaada huo utumike eneo la kupumzikia/kusubiria wagonjwa na ndugu wanapofika kupata huduma hospitalini hapo. 

Naibu Waziri wa Afya na Maendeleo ya Jamii, Jinsia, Wazee na Watoto, Dk. Faustine Ndungulile (katikati) akizungumza kuushukuru uongozi wa NMB kwa kutoa msaada wa mabenchi 52 ya kupumzikia wagonjwa na ndugu wanapofika kupata huduma katika Hospitali ya Taifa Muhimbili. Msaada huo unathamani ya shilingi milioni 10. Kushoto ni Kaimu Mkurugenzi wa Tiba, Hospitali ya Taifa Muhimbili, Dk. John Lwegasha na Meneja wa Benki ya NMB Kanda ya Dar es Salaam na Zanzibar, Badru Idd (kulia).

Naibu Waziri wa Afya na Maendeleo ya Jamii, Jinsia, Wazee na Watoto, Dk. Faustine Ndungulile (wa pili kulia waliokaa) pamoja na maofisa wa NMB, Hospitali ya Taifa Muhimbili pamoja na baadhi ya ndugu waliofika kupata huduma wakiwa wamekalia mabenchi hayo mara baada ya makabidhiano.

Naibu Waziri wa Afya na Maendeleo ya Jamii, Jinsia, Wazee na Watoto, Dk. Faustine Ndungulile (mbele) akiyaangalia mabenchi hayo maraa baada ya kupokelewa.

Na Mwandishi Wetu

BENKI ya NMB imetoa msaada wa mabenchi 52 yenye thamani ya shilingi milioni 10 ambayo yatatumika kukalia kwenye eneo maalum la kupumzikia ndugu waliopeleka wagonjwa katika Hospitali ya Taifa ya Muhimbili iliyopo jijini Dar es Salaam.

Akikabidhi mabenchi hayo jana, Meneja wa Benki ya NMB Kanda ya Dar es Salaam na Zanzibar, Badru Idd alisema benki hiyo inaunga mkono juhudi za Serikali ya Awamu ya Tano ya kuendelea kuboresha huduma za afya nchini.

Alisema Serikali inafanya mengi na makubwa katika kuboresha huduma za afya ikiwemo ujenzi wa vituo vya afya maeneo mbalimbali nchini, hivyo NMB kwa kutambua umuhimu wa afya itaendelea kuchangia.

Alisema msaada waliokabidhi wameutoa baada ya uongozi wa Hospitali ya Taifa Muhimbili kuiomba NMB isaidie mabenchi ili ndugu wanaokuja kupata huduma eneo hilo wapate hifadhi nzuri wanaposubiri kuhudumiwa.

"...NMB tumeamua kushirikiana na Hospitali ya Muhimbili pamoja na jamii yote inayozunguka hospitali hii kwa kuchangia jumla ya mabenchi 52 imara kwa ajili ya kukalia ndugu na wagonjwa wa hospitali hii kubwa ya Muhimbili, yote yakiwa na thamani ya milioni 10," alisema Bw. Idd.

Aidha Idd aliongeza kuwa kwa mwaka 2018, NMB imetenga zaidi ya shilingi bilioni 1 kwa ajili ya kuchangia maendeleo ya jamii ikiwemo kusaidia sekta ya afya na Elimu.

Kwa upande wake, Naibu Waziri wa Afya na Maendeleo ya Jamii, Jinsia, Wazee na Watoto, Dk. Faustine Ndungulile akipokea msaada huo aliishukuru Benki ya NMB kwa kuendelea kuunga mkono juhudi za Serikali kutatua changamoto za afya na kuwaomba waendelee na moyo huo.

Alibainisha ili kuboresha sekta ya afya Serikali ya awamu ya tano, imetenga bajeti kubwa kwa ajili ya kununua madawa na inajenga hospitali 63 za Wilaya maeneo mbalimbali kwa sasa, hivyo kuwaomba sekta binafsi kuendelea kuunga mkono juhudi hizo kwa namna anuai.

Meneja wa Benki ya NMB Kanda ya Dar es Salaam na Zanzibar, Badru Idd (kulia) akizungumza kabla ya kukabidhi msaada huo. Katikati ni Naibu Waziri wa Afya na Maendeleo ya Jamii, Jinsia, Wazee na Watoto, Dk. Faustine Ndungulile pamoja na Kaimu Mkurugenzi wa Tiba, Hospitali ya Taifa Muhimbili, Dk. John Lwegasha.

Meneja wa Benki ya NMB Kanda ya Dar es Salaam na Zanzibar, Badru Idd (kulia) akisalimiana na Naibu Waziri wa Afya na Maendeleo ya Jamii, Jinsia, Wazee na Watoto, Dk. Faustine Ndungulile (katikati) mara baada ya kuwasili katika hafla hiyo. Katikati ni Meneja Mahusiano Biashara za Serikali NMB, Faraja Kaziulaya na Kaimu Mkurugenzi wa Tiba, Hospitali ya Taifa Muhimbili, Dk. John Lwegasha (wa kwanza kushoto).

Sehemu ya msaada uliokabidhiwa.